人有三衰六旺，澳洲騎師柏寶屬於後半部。佢上周三晚（15日）因同鄉潘頓唔舒服而幫佢做替工，結果就憑蔡約翰馬房「勁皇子」打破近兩個月頭馬荒。
所謂殺得性起，去到昨晚（22日）柏寶又有馬贏，佢憑蘇偉賢馬房「皇帝誥令」食頭糊，再次揚威谷草，自信心明顯返晒嚟，周日（26日）沙田日賽隨時又有斬獲。
雖然柏寶上周日（19日）在沙田馬場冇馬贏，但卻跑獲亞季殿各一，包括策騎蔡約翰馬房「詠彩繽紛」於一班1400米入Q，從而替座騎取得開季以來最高名次。
蔡約翰今次與柏寶繼續有交收，前者把「翔惑」（三班1400米）及「精算博奕」（三班1600米）交由後者策騎出賽。
其中「翔惑」季內曾於1400米路程贏過三次，上仗跑第十關乎沿途在第三叠望空競跑，浪費不少氣力，形成表現失準。
今趟匆匆再跑首本途程，柏寶以往騎兩次獲一季，人馬有一定默契，質新當打的「翔惑」可望重振聲威。