車路士中場尼高路簡迪今季由李斯特城加盟後繼續踢到曉飛，好大機會連續兩季幫效力球隊稱霸英超，滿場奔走嘅態度同出色嘅搶截能力更為人擊節讚賞！簡迪勁到咁，喺twitter亦衍生出一個名為「Kante Facts」嘅惡搞專頁，每日都會精選一啲關於簡迪嘅「偽知識」，例如「地球表面有70%係水覆蓋，其餘30%就係簡迪嘅」、「簡迪唔使用twitter，佢已經跟蹤（follow）緊你」之類嘅爛gag，已經贏得超過6.5萬個追隨者同7,000個likes啦。
呢段Kante Facts熱潮直情連當事人都知，搞到簡迪周三為法國國家隊備戰期間都要笑住澄清：「我的確好滿意今季嘅表現，得到好多讚賞亦令人鼓舞，但我嘗試唔好俾呢啲事情影響。車仔隊友有同我講過『Kante Facts』嘅專頁，但只係搞笑啫，我梗係冇覆蓋30%地球表面啦哈哈！」