經濟前景未明，唔知係咪因為咁，政府率先為暑期工凍薪。有政府部門噚日開始招聘今年夏天嘅暑期工，今年暑期工嘅月薪亦揭盅，同舊年一樣係9,600蚊，同以往幾年加幾百蚊唔同。不過有近成萬蚊嘅暑期工，即使月薪冇得加，9,600蚊一個月喺市場嚟講都算唔錯啦。截止申請日期係下月5日，想申請就要快啲囉。
率先招聘嘅政府暑期工係路政署，讀土木工程、測繪及地理資訊嘅大學生要留意吓，路政署正招聘讀相關科目、將於明年畢業嘅大學生。讀土木工程嘅同學獲聘後要協助公路、鐵路嘅設計，協助視察地盤同整合工程記錄。而測繪及地理資訊嘅同學，獲聘後要協助進行各類工程測量、收集道路設施數據、檢查數據同評估軟件、協助地理訊息系統運作，工作亦包括檢查數據、修正數據同開發軟件。