中環夜場Volar母公司高門集團（8412）噚日起招股上市，翻開招股書，認真星光熠熠，老闆吳繩祖（Kester）係外資大行前賓架，佢老婆係九巴雷氏後人，而公司一名上市前投資者係已故富商李寶椿孫女李家琦。
翻查資料，李家琦爸爸係李寶椿第八子李兆堃，而根據招股書專做物業投資嘅李家琦舊年中斥資360萬元入股高門。Kester指，李小姐除咗係名人，喺國際飲食行業亦有強勁人脈，入股投資可以幫到公司發展。
老闆娘係九巴雷氏後人
至於Kester本身，佢太太雷兆森（Andrea）係九巴雷氏後人。Kester做過美銀美林、摩根大通等外資投行，仲曾經同港交所（388）行政總裁李小加喺摩通做過同事。佢後來唔做賓架，2013年收購Volar做老闆。
離開投資銀行多年，眼見目前新股上市，企業、投行同監管機構越來越多角力，Kester會否慶幸已離開熱廚房？佢好識做，笑住話唔會咁講，但家陣換轉身份做老闆去申請上市，終明白以前湊上市嘅老闆點解咁大壓力，感受好唔同。
而佢做過投行始終有好處，就係舊同事唔少轉咗做投資者，知道Volar上市，都有搵佢想見面，睇吓有冇投資機會。高門預計4月7日上市。
李華華
mailto:[email protected]