友邦（1299）老臣子、今年79歲嘅謝仕榮，噚日起由非執董轉做獨董，保留主席一職，佢咁多年嚟儲埋儲埋，原來有成356萬股友邦，按噚日友邦收市價50.2蚊，呢筆股票市值1.8億元，真係印印腳唔使憂。
如果謝生唔沽友邦，一年可以收到305萬元股息，計埋每年袍金高達57萬美元（約440萬港元），一年有7球都好好使。
謝仕榮為友邦效力差唔多55年，見到友邦業績近年非常不錯，應該老懷安慰。噚日友邦又宣佈碧咸成為集團代言人，想大力推AIA Vitality呢個應用程式（即係運動越多，保費越平），萬人迷是否威力依然？真係睇過先知。