適逢櫻花季節去日本，周圍都會看見加入櫻花元素的食品。當連Starbucks也推出櫻花限定飲品，日本麥當勞也不執輸，同時推出櫻花為主題的櫻花櫻桃凍飲、鬆脆櫻花麥旋風和櫻花蝦Shake Shake粉薯條，單是粉紅色賣相已俘虜不少少女心。
日本M記每期都會推出限定食品，今期食正3、4月花期，大推浪漫櫻花雪糕系列，除了Shake Shake薯條講到明玩食字「櫻花蝦」而沒有加入真櫻花外，櫻桃味雪糕和凍飲分別都加入真●櫻花元素，絕非只求取巧。
記者親試櫻花蝦Shake Shake薯條，雖無加入真櫻花，但帶鹹香的蝦味薯條勁惹味非常，秉承一貫Shake Shake薯條的好味道。Shake Shake粉只需港幣2蚊包，買返香港做手信一流。
櫻花麥旋風，軟綿綿雲呢拿雪糕加入櫻花麻糬醬及粉紅色甜脆片，成杯雪糕充滿櫻花飄落的意境，吃下去有點似杏仁味，但帶果香的酸甜，非常特別。
櫻花櫻桃凍飲感覺似足夏季特飲，層層漸變的粉紅色勁有春天氣息，令人心花怒放，而且出品跟相片一樣靚，單靠賣相已值回票價！特飲以櫻桃味果汁、櫻花及炭酸汽水製成，飲下去沒有平日「櫻桃」常帶的藥水味，反而清新又有特別花香，日本出品果然有驚喜。至於是不是真的櫻花味就不得而知了，畢竟不是人人也食過真櫻花嘛！
記者：王秋婷
2017果籽繼續認真知味。識買惜用。行以求知。好事多為。重修舊好。
緊貼果籽報道，即like： http://fb.me/AS.AppleDaily
