特首選舉將快謝幕，曾俊華過去透過多個名人撐佢嘅短片喺facebook狂呃like，噚日薯片叔決定玩show hand，上載一條15分鐘嘅「杜sir飯局」短片，影住佢喺名導杜琪峯陪同下，由買餸到下廚，食完飯薯片叔仲首次公開彈結他，賓客喺佢伴奏下合唱《浪子心聲》。可能大家都知大局已定，惟有高唱「命裏有時終須有，命裏無時莫強求」，政界已熱傳林鄭月娥數緊票，𠵱家只係睇贏幾多。
檔主爭住合影
薯片叔同名導杜琪峯、前記者張寶華去九龍城街市買餸，唔少師奶都好驚訝見到薯片叔嚟買餸，有檔主主動上前同佢影相（唔似周永新教授咁被動囉）。
薯片叔之後表演煮台山糯米雞，不過佢太太曾黃蓮華似乎嫌佢唔夠爽手，但張寶華就大讚曾俊華揸鑊鏟有板有眼。
曾太話自己當年同薯片叔拍拖時，都係順其自然，但薯片叔自己當年見到太太就好大感覺，好認真兼強調自己同曾太拍拖時，冇其他女朋友，曾太即時大笑起嚟，似乎好sweet咁喎。
薯片叔有份下廚嘅呢餐飯，安排咗唔少名人出席，包括李鵬飛、翁靜晶、廣東話專家歐陽偉豪（Ben sir）等，席上嘅DJ森美話，如果最終港人嘅意願同中央要求選委投票產生嘅特首唔一樣，「咁咪好不知所謂？」其實，香港人過去5年都慣晒終日不知所謂啦，睇開啲。薯片叔就話，今次呢個杜sir飯局，席間互相交流對時政嘅看法，係參選嘅一套外傳。
曾經夾過band嘅薯片叔，飯後攞出結他，喺佢伴奏下，同大家唱一首《浪子心聲》，但似乎彈得唔係好啱beat。呢個時候唱呢首歌夠晒應景，襯托一下星期日一個已知嘅結局。
李八方
