雷神即是雷神！今晚（22日）跑罷第七場一班1800米跑馬地銀瓶，佢就要趕去機場，搭夜機飛往杜拜，為周六出戰杜拜世界盃賽馬日做準備。臨走前雷神今場夥拍方嘉柏馬房「萬馬飛騰」，採取中段加速先發制人戰略，就此帶返終點大勝4.5馬位，勇奪本屆跑馬地銀瓶，更造出快活谷1800米紀錄時間。
「萬馬飛騰」馬主大華賽馬團體中人，為已故全國政協副主席馬萬祺的家族成員，包括其孫兒澳門立法會議員馬志成。「萬馬飛騰」係香港現役極少有的黑色賽駒，之前兩次配雷神跑谷草一哩全勝，今仗加程至1800米順利再贏，人馬合作三戰三捷，默契之佳可想而知。
「萬馬飛騰」俾雷神騎到出神入化，呢場更以1分48秒05刷新谷草1800米紀錄時間，打破了約十二年前「詩情畫意」的1分48秒2舊紀錄。可惜馬志成這晚無現身。
莫雷拉勝出第七場後，整晚已憑「綫路神駒」、「麯院風荷」及「萬馬飛騰」累積三捷，已穩勝這晚騎師王。至於「萬馬飛騰」練馬師方嘉柏身在杜拜為「誰可拼」出爭周末金莎軒錦標做備戰，今晚不在場親自捧盃。跑馬地銀瓶堪稱方嘉柏至愛，佢於近五屆賽事他贏了四屆，僅上屆冇馬出而冇馬贏。
第七場二至四名順序為「勁趣」、「縱橫大地」及「包裝騎士」，四重彩派2,680元。