星期日就係特首選舉投票日，大部份冇票嘅市民只能閘外觀戰；至於嗰稀有嘅1,194名選委，9點至11點就會喺灣仔會展投票！
八方聽聞，因應有團體場外示威，為免選委到場投票受阻，據聞西邊強力部門已經溫馨提示建制選委，3.26最好早啲到，早投早着早收工，而有百幾個選委嘅民建聯呢，據知亦有核心內圍嘅最核心領導「建議」，最好朝早8點現身，確保順利進場，萬無一失……意指投林鄭嗰張票。（之後當然都要坐定定，直至確認冇第二輪投票，新主順利登場！）
八方仲聽聞林鄭日前親臨民建聯拜票時，最核心領導亦預先幫第二三四梯隊爭定凳仔，笑笑口開到聲話，年輕從政者上位途徑不足，仲以黨內唔少大佬都喺議會退下火線畀新仔上場為例，寄望林鄭當選後提供多啲畀年輕人從政嘅機會，理所當然hardsell民建聯都有人才，唔知會唔會令林鄭另眼相看？