王光亞去年年尾在深圳召見部份香港選委，講過選擇香港特首之四大標準，即係（一）愛國愛港、（二）中央信任、（三）有管治能力、（四）港人擁護。
何謂愛國愛港，只有中央幾位政治局委員先至夠膽講，有力講，至於「中央信任」，更加係習核心獨家之言，2012年選舉時，最後習近平信任梁振英，咪派劉延東到深圳召見選委，頒旨下令佢地轉軚投梁，放棄江澤民派信任嘅唐英年囉。現在乜人都知張德江已頒下習旨，要建制派選委信任林鄭月娥，毫無懸念咯；至於管治能力與港人擁護，就有啲客觀標準，前者有政績可審核，後者有民意調查可依據，呃唔到人。林鄭與莊曾皆在政府服務多年，女嘅搞社會行政與政治多啲，男嘅近十年集中做財金，各有所長，難分高低，夾硬話莊曾得與唔得，係視乎意識形態之分別（即類似干預派與市場派之別），拗到天光也難分勝負。
最易分勝負就係民望，港大中大嶺大嘅民意調查皆顯示曾俊華遙遙領先其他兩位對手（林鄭月娥與胡國興），過往三任特首在選委投票前夕，都係在民意方面領先對手嘅，令中央有面子，可以大聲講押注中咗，港人冇聲出。偏偏呢次就係中央欽定嘅林鄭在民意方面輸幾條街，中央押注落佢度，咪好冇面，俾港人覺得夾硬嚟，林鄭贏咗都唔馨香，以後五年點樣捱過？
資深政治編輯去完北京採訪兩會及向一啲高官收風，俾左丁山拉去校友會午餐例會講特首選舉。編輯對一眾校友話林鄭篤定當選，問題係得票如不夠七百，西環好冇面，故此仍然拼命箍票，佢就估計最後得票會在750之間。左丁山問：「攞到789票得唔得呀？」編輯話：「好似難啲喎！」照計選委會有1194票，減除泛民325票，餘下869票盡屬建制，理論上可盡投林鄭，唔會有百零票咁多流失呀！」編輯再講：「我在北京得到一個印象，就係多講中央信任，少談市民擁護，幾乎等於冇講過呢項標準咁滯。」林鄭咪令到中央失威？難怪口頭話民意如浮雲，掉轉頭就引用香港研究協會嘅調查數字講林鄭民望超越莊曾。呢個甚麼「香港研究協會」面貌神秘，其網站資料甚少，外人不知誰是管理人，與本港大學嘅民意調查之公開透明度相差極遠，公信力在那裏呀？睇吓呢間調查嘅樣本，共1365人，有學位者佔36%，收入超過（最高階）6萬元者有15%，自稱係社會中上層／上層者就只得7%，自稱中下層／下層者有55%，三個數字已產生大矛盾，可疑得很，得啖笑，林鄭急不擇食，搵呢個調查嚟為自己面上貼光，幾慘情。