竟然食個飯盒，都可以寸人？話說特首候選人曾俊華競選辦近日向擅於炮製卡通人物便當嘅網上烹飪導師古靄茵（Candace），訂咗十個「薯片叔叔」嘅造型飯盒，每個飯盒嘅「薯片叔叔」由飯糰整成，薯片叔見到就乘勢發功，大讚飯盒賣相吸引兼味道唔錯，繼而扯至政府要充份掌握民情，藉此反駁批評佢返工旨在儲like like嘅林鄭啦！
睇番呢個飯盒，造型模仿「薯片叔叔」，網民留言大讚可愛，有人笑言「唔捨得食」，薯片叔都大讚飯盒係巧手傑作，而競選辦嘅兩位「AO界烹飪高手」加上有個日籍丈夫嘅烹飪導師Candace，「三位高手的交流既有趣又專業」。
烹飪高手︰薯片張枱真乾淨
醉翁之意不在……飯盒，薯片叔繼而話近年社交平台發展蓬勃，好多「民間高手」喺網上建立事業，網上生活已同現實生活融合，強調政府如要充份掌握民情，「必須摒棄『上網就是Hea』、『返工上FB一定是偷懶』等等落伍觀念」。
佢又舉例「香港人並不是『忽然愛港足』」，提到「單刀橫傳」、「韋拿踢法似我」及「英雄輝」等熱門詞彙，「香港人撐香港足球，從網上醞釀、發酵、爆發到變成廣泛信念，是典型的網絡民情」，令人聯想到日前港足代表隊開操時，林鄭突然到場被網民質疑「忽然撐港足」。
Candace就喺自己fb話，近日炮製咗飯盒比呢位「長輩」，仲搞笑話佢張枱真係好乾淨，大讚薯片叔好慈祥、和藹可親有禮。
李八方