【運動產業】
由「圍威喂」打機變成一項運動產業，電競需要大量人才。20歲出頭的方俊謙（底線）及朱仲賢（朱仔），過去分別為電競賽評及寫手，大半年前獲天使基金成立「電子競技學院」，為本地首間開宗明義的「打機學校」，為有志投身行業者提供方向。
底線表示，電競在外國已發展成運動產業，「係可以賺到錢」，本港亦不時有選手打出好成績，但政府直至今年財政預算案始作研究，「𠵱家先可以話係開始階段」。他指越來越多年輕人想加入電競，認為有需要成立一間專門學校，提高社會對電競的理解，「呢個係講運動精神、競技元素，要團隊合作，並唔係拎住鍵盤做鍵盤戰士就夠」。
學校課程目前以遊戲「英雄聯盟」為主，會評核學員適合成為職業選手，抑或是充當幕後支援，「好多人鍾意打機但係唔叻，識講嘢可以做主播、賽評，亦可以學做設計、轉播（技術），學相關軟件適應市場」。底線及朱仔負責選手班，他們會分析遊戲版本角色強弱，並以職業比賽片段為例，「話畀佢啲知選手要點做溝通」，笑言首堂通常「靜過圖書館」，但完成課程後學懂策略及團隊合作，整體表現會有所進步。
5堂學費$1,000
課程每堂3小時，以5堂為一單元，每單元學費需1,000元，至今已有100名學員。底線稱學員組成相當廣泛，有輟學青年，亦有逾30歲的成年人追夢。曾為歷奇教練的他稱並非所有學員都會投身電競行業，但會將人生導向融入課程，「試吓幫佢哋搵番目標」。
■記者佘錦洪