想食朱古力？想打邊爐？想大擦一餐燒烤？潘頓、郭能等重磅騎師，你哋諗吓好喇！
早前神奇小子曹星如，贏得21連勝之前，就因超重0.2磅，差啲過不到磅未打先被取消資格。其實騎師一樣都需要這樣做，每位騎師跑馬前後，都要去過磅，看看是否符合按出賽馬評分高低而訂的負重。
現時馬匹負重上限為133磅，最低是113磅，所以騎師連食飯、飲杯水，都要諗過度過，先敢放落口。通常一個騎師去到百二磅已經算重，唯有不停做運動去焗汗減磅。騎師羅理雅表示自己通常會吃三餐，但每餐份量不會太多，他覺得無論怎樣，都得吃點東西，才能維持蛋白質水平。
現時排騎師榜頭位的雷神莫雷拉，又會食甚麼？雷神說最喜獲肉類燒烤，但只得個恨字好少食，反而會多吃蔬菜，也會吃點米飯，亦吃挺多魚，因為魚比較健康。而潘頓一直都受體重困擾，因好易超出120磅，唯有以節食同飲極少水減體重，但換來代價就是搞壞身體，還因為尿液太少，令到生腎石。他還試過在家內出現幻覺神智不清暈低。上季潘頓亦曾因背部劇痛，曾在賽事期間倒下送院。雖然騎師表面好風光，但減磅的辛苦同毅力，真是不容易。