呂健威馬房近排持續有馬轉廐及退役，急需贏馬穩定軍心。這晚（22日）谷草第三場四班1200米，呂廐旗下冷馬「一支梅」可謂贏得合時，此駒在何澤堯胯下後上氣走新勝馬「得意繽紛」，爆14倍冷Win開齋，組合獨贏A3派17.5元，呂廐宣告走出低潮。
今晚跑馬前，呂健威已一個月冇馬贏，對上一次贏馬已數到2月19日在泥地由田泰安勝出「公証揚鳴」，馬房氣勢認真麻麻。幸而五歲愛爾蘭自購馬「一支梅」呢場表現生性，本身第13次在港出賽，首度配華人騎師何澤堯，5檔起步沿途居中，末段從中叠位置後上一衝過晒贏0.75馬位，強如新勝同班同程的「得意繽紛」都頂佢唔住，「一支梅」就此打開在港勝利之門，亦造就何澤堯季內首次為呂健威建功。
「一支梅」馬主葉韋彤Tarzan是化妝品連鎖店卓悅太子爺，亦是JW(王灝兒)的男友，本月JW出席活動受訪，承認和葉韋彤一齊了一陣，感情開始穩定，葉韋彤常煮東西給她吃。
JW這晚冇現身，葉韋彤今場賽後表示，今次是他第一次拉頭馬，感到十分開心，經朋友介紹購入「一支梅」，聽呂健威分析，此駒後勁增強有所進步。葉韋彤解釋把愛駒改名為「一支梅」，因為當時零售業步入寒冬期，有傳媒形容他公司為雪地一支梅，所以他靈機一觸，馬兒亦叫「一支梅」。
第三場二至四名順序為「得意繽紛」、大熱門「蓋世之寶」及啡燈大注落飛馬「紅褲精神」，四重彩派八萬七千幾。