林鄭月娥勝選在望，新班子係點成焦點，佢早前透露過新班子會注入新血，財金班子會更多。據聞突然升呢嘅財爺陳茂波唔係林鄭杯茶，林鄭絕對唔想一上任就太多負資產，但佢想換血之際，阿爺始終想財金系統穩定，據聞做咗兩屆局長嘅陳家強（圖），係中央屬意過渡新班子嘅人選；至於商經局局長蘇錦樑，據聞傾向功成身退多啲時間陪老婆。
最近亦有傳當年有份推動教改嘅前中學校長戴希立，會係林鄭嘅教育局局長人選，但據知林鄭日前出席民建聯座談會被問及此事時，否認搵過對方。而除咗教育局局長吳克儉、運房局局長張炳良打咗開口牌話唔留任，人稱「民望高」嘅食衞局局長高永文雖則未表明意向，但有傳身為醫生嘅佢有意搵地方落腳，鋪路7.1後重操故業搵真銀。
雖則外界認為政務司司長係張建宗同譚志源之爭，但八方聽聞兩人都唔係林鄭首選，但亦未有透露心水之選；至於律政司，袁國強都唔留任，有建制派話經歷過曾班子年代「唔聽話」嘅黃仁龍後，中央特別睇重出任此職人士嘅政治忠誠。