林鄭鐵票在握，建制選委在台下連貓尾都唔扯，只顧扯鼻鼾。鄉紳乾脆提早離場，對記者說，好Q悶。
326，唔使等埋習攬，市民想像一下，當選後林鄭特首領導下的香港，會係咁樣摺埋：
所有枱面人物自動升呢，搶住封自己做中央代言人。「唔係咩，我一早話過，林鄭是中央最支持的，無點錯相無點你呀嘛。證明我內線勁，同阿爺核心有密偈傾咯，你唔羨慕得咁多！」這批代言人，由八百個急速細胞分裂複製到八萬個，個個要林鄭找數！
認屎認屁的偽中央發言人，巴巴閉閉，連公務員都被串。唔打算跳船的高級公僕再難忍辱，考慮劈炮。但考慮期間，第一時間，要執過張枱，自拍枱面上的廁紙和file山！以示好捱得！周末，未來五年成為AO禁詞！問人周末有乜節目？仲難聽過三萬三個差佬講粗口。
鄉黑有恃無恐，橫掃新界十八鄉，林鄭嫌遠唔會落區到泥頭山！撐過林鄭的鄉黑有功，東莞汕尾的政協獎賞手到拿來，路政署邊敢政協頭上動土！
林鄭是中環特首，鄉黑係新界老頂，邊個打得，邊個摺埋？你懂的。