「小豬」舒韋恩史迪加周二落實去芝加哥火燄，臨走前拍片多謝曼聯嘅職球員同球迷，仲話喺奧脫福嘅日子令佢畢生難忘。雲高爾喺教曼聯時豪花2.58億萬鎊（約25億港元）簽咗13個球員，經已有六個走咗，小豬係其中之一，之前五個係迪馬利亞、法卡奧、域陀華迪斯、舒尼達連同埋迪比。雲高爾嘅子弟兵得番安達靴里拉、勞基梳爾、馬高斯盧祖、戴利白蘭特、安東尼馬迪爾、達美安同埋羅美路，當中得靴里拉、盧祖同馬迪爾企得住腳，睇嚟其餘四個都有機會喺今夏離隊。
另外，喺周二隨英格蘭操練嗰陣俾基斯史摩寧整傷腳趾而搞到要退隊嘅菲爾鍾斯，如傷勢嚴重有可能提早收「咧」。曼聯嚟緊四月要踢九場波，冇咗鍾斯一定影響後防佈陣，摩連奴真係多得史摩寧唔少嘞。