練馬師蘇偉賢近期重新出發，今晚（22日）於谷草一開場，即與澳洲猛將柏寶合作以「皇帝誥令」勝出頭場五班一哩，此駒季內表現進步，五戰兩冠一亞兩殿，呢場單Win及組合獨贏A2分別派69.5及29.5元。
蘇偉賢早前以「發盈喜」征戰杜拜失敗，該駒因而無法進軍本周六（25日）杜拜世界盃賽馬日大賽，只好運返香港，而蘇偉賢收拾心情後，馬房成績亦重新上升，這晚憑「皇帝誥令」食出頭糊，亦令整晚谷戰他有個好開始。
「皇帝誥令」身處五班擺明超級，今場沿途居甚後位置，轉最後一個彎柏寶以兜大圈跑法，避免塞車，但因此蝕位極多，形勢惡劣，然而馬兒衝勢未有減弱，最終以頸位之先勝出。柏寶上周三（15日）晚做潘頓替工，憑蔡約翰馬房「勁皇子」打破頭馬荒後，今晚繼續贏馬揚威谷草，個人戰績亦見持續回升。
蘇偉賢表示「皇帝誥令」雖來自南半球，但卻非常遲熟，這匹馬令練者學懂一樣東西，就是不可一概而論說南半球馬一定比較早熟些。蘇偉賢幽默地笑言，「皇帝誥令」馬主馮柏棟與打吡盟主「佳龍駒」馬主洪祖杭非常老友，托洪生鴻福帶旺「皇帝誥令」。練者話賽前最驚「強中堅」，柏寶今仗發揮「皇帝誥令」很好，加上馬兒由1400米增程跑谷草一哩更合，希望牠開竅後越跑越好，並感謝馬主馮柏棟的耐性。
頭場算係熱門天下，二至四名分別為「五星特工」、「自由飛翔」及「強中堅」，四重彩派5,625元。