賭王囝囝同航空公司嘅罵戰，都算係近期花生味重嘅新聞，航空公司口口聲聲話唔知對方身份，其實真係假咗啲；自從龍蝦女大鬧機場單嘢，香港人都接受特事特辦㗎啦，共產黨就講階級鬥爭，所以香港富二代有多特權，係理所當然喎。不過足球界，星二代往往唔係太好，好彩近日就爆出荷蘭前鋒古華特個仔祖斯甸古華特，已經升上阿積士一隊兼取得入波，雖然只係17歲仔，以目前進度成為荷蘭國家隊未來成員，都真係唔難。
荷蘭失落歐國盃決賽周，𠵱家就收拾心情爭明年世界盃決賽席位，仲遇上歐國盃亞軍法國呢個大敵；如果畀着以前，荷蘭對法國都算係半斤八両，但𠵱家就稍為次咗一級。荷蘭唔係冇青訓，最大問題係出咗斷層，中生代打唔起，今時今日荷蘭仲要靠老將洛賓撐場，史奈達、亨特拉爾等老將，都係上年先開始冇入圍。球隊曾經用一批26、27歲嘅當打球員，為明年世界盃、甚至三年後歐國盃準備，但中生代只有史杜特文叫唔錯，佢都算擺脫嚴重傷患打番起，其餘好似韋拿杜姆、戴利白蘭特等，都只係普通貨色。
不過數番再後生啲，荷蘭反而有啲人才，好似23歲嘅迪比，20歲中場藍斯拿亞等，但換血時間太慢，如果立即搵班年青球員領軍，戰績亦難免反覆，所以呢一、兩年荷蘭都應該冇咩運行，要等一等三年後歐國盃啦。
文：牽牛