一直被指冇乜政務官埋班助選嘅林鄭月娥，早前喺一個選委論壇為自己平反，解釋自己冇搵政務官（AO）幫手，其實係唔想喺一個資深政務官嘅定期飯局中，同曾俊華、葉劉淑儀（圖）鬥搶人，令「AO飯局」團結變分裂。
八方噚日見到葉劉，問吓佢點睇啦，點知葉劉自爆，佢好耐冇去呢個飯局喇，又話呢個飯局嘅人腳查實並非相當資深嘅AO，主要人腳實際約係D6級或以上嘅政務官。
葉劉強調：「但幫我嗰啲，係好資深嘅AO。」
對於民主黨前主席劉慧卿引述已經退休嘅高官話，有三位AO會喺林鄭上場後劈炮，拒絕同林鄭合作，葉劉就話自己冇聽過，但的確每年都會有AO「夠鐘」退休㗎喎！