瑞房（272）噚日公佈業績，見到老闆羅康瑞，當然要問佢特首選戰喇，佢以往係「梁粉」，家陣轉為「奶粉」，奶媽日日被人鬧，佢應該幫口講兩句喎。
點知羅康瑞選擇封口，話只係講業績。會後佢一再被人追問，只係尷尷尬尬咁提醒大家，佢係林鄭嘅資深顧問，當然支持佢。問到外界評論成日笑林鄭，佢有冇覺得唔公平，或者會否希望下任特首好似「女媧補天」咁，修補社會撕裂呢？羅康瑞聽完只係搖搖頭、笑笑口走咗去。
同場仲有羅康瑞寶貝女羅寶瑜（Stephanie），中期業績時Stephanie因為有咗BB要休息，噚日再見，佢已經修晒身，容光煥發，睇嚟小朋友乖巧又易湊，唔會搞到靚媽咪夜晚冇覺好瞓。