摩納哥家陣行波圖路線，打起唔少年輕嘅法國球員令國家隊受益，好似今次法國大軍名單中，就有五個摩納哥球員，全部都係年輕有活力，今季表現一鳴驚人！
法國家陣喺世盃外歐洲區A組排緊榜首，以三分領先緊主要對手荷蘭。法國雖然冇召賓施馬，保羅普巴又傷咗，但陣容一啲都唔弱，因為一代新人勝舊人，一班摩納哥球員崛起。摩納哥近年轉咗做轉口商，唔會用天價去買球星，而係將法甲中下游踢得好或者有潛質嘅球員收歸旗下。摩納哥唔求法甲冠軍，但要穩定踢歐聯，咁樣先可以保持到高曝光率。就好似安東尼馬迪爾，佢係摩納四年前由里昂買入，之後被包裝成「新亨利」，曼聯就咁落搭，而摩納哥亦賺到一大筆轉會費。
估唔到嘅係馬迪爾呢個「新亨利」已經out咗，摩納哥今季培訓咗基利安洛天出嚟，成為最新嘅「新亨利」，而佢亦順利入選今次大國腳。摩納哥舊年夏天喺里爾同馬賽分別買入迪積比爾薛迪比同埋班捷文文迪，呢兩名廿歲出頭嘅後衞都踢出身價，有份入選今次法國國家隊，其中文迪嚟咗摩納哥先獲迪甘斯青睞。摩納哥幫到呢啲半紅不黑法兵入國家隊，一嚟提高球員身價，二嚟會吸引更多初露頭角嘅法兵去摩軍。爆晒字𠻹，最後提埋摩納哥仲有中場泰莫爾巴卡約高同湯馬士林馬入選「雄雞軍團」。
文：咖喱