噚日八方朝早一起身就收到N張「林鄭2.0」嘅相，相中人同林鄭嘅髮型、面型同造型都好相似，之咪就係原香港郵政署長丁葉燕薇。政府宣佈由佢出任候任行政長官辦公室秘書長，附上嘅丁太官方相，同林鄭似足失散姊妹；而由盛傳係林鄭愛將嘅丁太出掌候任辦呢個安排呢，官場中人大讚既窩心同體貼，至少丁太同稍後極有可能出現嘅香港女特首，唔會火星撞地球。
查實除咗丁太，有心人都發現，尚有一位女高官嘅造型都係「林鄭2.0」，就係人稱「騰雞美華」嘅民政事務總署前署長陳甘美華。八方上網用啲程式測試吓，唔係講笑，個程式都話好似，甚至話相似度達100%！連白鴿黨副主席羅健熙都覺得激似，仲喺fb將三人玉照拼合，封佢哋為「官場三姊妹」（佢特別表明非恥笑）。
林鄭要做阿二
若然要排番大細，1956年出生嘅陳甘係大家姐，遲陳甘一年出生嘅林鄭則以59歲之齡做阿二，1963年出生嘅丁太則以54歲做妹妹。但可惜騰雞美華已退休，三位林鄭同台嘅機會應該唔高嘞！