「我想哭但是哭不出 等到思念像海 淹沒我而愛已不再……」
睇見呢場由中聯辦悉心掌控嘅選舉，睇到兩邊陣營「粉粉」不平，無票嘅普通市民，可謂哭笑不得，欲哭無淚，而極有可能成為香港首位女話事人嘅林鄭月娥，就被揭曾經鬧到政務官大喊一場，包括財經事務及庫務局常任秘書長（庫務）謝曼怡（Elizabeth）……雖然E謝已經否認，強調會緊守崗位，但唔少人都話空穴來風……
Eva老友話佢好堅強
其實官場流傳因為林鄭而梨花帶雨嘅女高官，唔只E謝一個。有知情人士話聽聞蔡潔如Kitty Choi都係林鄭威權下嘅受害人。睇番吖，Kitty喺2012年7月16日出任行政署長，林鄭則喺梁班子中做政務司司長，既然行政署直屬CS Office，工作壓力可想而知，所以有傳Kitty被鬧到喊之時，據聞係正值佔中爆發之際，被鬧到喊真係不足為奇，跟林鄭做嘢嘅人，通常忍耐力要超凡。
八方聽聞，遠至林鄭未做政務司，亦試過搞到女同僚忿忿不平而流淚。官場早已流傳曾班子年代，即係林鄭做發展局局長之時，經常因土地及房屋問題同時任運輸及房屋局局長鄭汝樺（Eva）片過，有次兩女仲入咗上司嘅office嘈交（邊位上司？有啲留白好似好啲！），最終威力唔夠強嘅Eva委屈到爆喊，上司見到都無可奈何，惟有提示「嗰邊有紙巾」打圓場。雖然Eva透過老友同八方講，Eva話佢冇喊過喎，老友都話Eva係堅強嘅女士，總之在任官員嘅時候，只想做好份內嘅事。聽落係咪有啲可圈可點？
唔知3.26後嘅政府總部，係咪都要放多啲紙巾，以備不時之需？八方只知經過呢次選戰，林鄭知道邊度有紙巾兼廁紙買咯。