【本報訊】粉嶺欣盛苑停車場早前翻新，在出入口坑紋斜道髹上地台油，疑為慳錢無混合防滑鋼沙，結果前日雨後露險情，入口斜道遇水變「瀡滑梯」，車輛跣胎無力上斜，甚至出現「神龍擺尾」飄移驚險場面。有車主炮轟停車場管理層反智，管理公司昨晨急忙派人鏟走地台油。
地台油無加防滑鋼沙
共有252個車位的欣盛苑多層停車場，一周前大翻新。車主許先生講述他經歷斜道溜後的情況，指當時他駕駛客貨車上斜，中途後車轆已跣胎飄移，踩油加速也無法抓實地面，最終要倒後，許無奈地說：「除非搵大纜扯我架車上去。」
記者前日到場發現，由於前日天雨關係，外出回來的私家車車身均濕淋淋，在入口上斜驚險萬分，大都未及中途已無力上斜，或失控溜後，或傾斜擺尾。有車主連向上駛數次失敗，索性打退堂鼓，怒罵管理員：「你根本逼個司機危險駕駛，起碼兩邊有人企喺度睇住，管理員蹺晒手乜都唔做，睇戲呀？」
■記者翁鈺輝