歌仔都有得唱：「能迴避嗎我慣了當那電燈膽」，但今次八方真係避無可避。事關半島酒店搵嚟有「英國藝術教父」之稱嘅大師Michael Craig-Martin，喺大門口個噴水池隔籬，豎立一件4米咁高、成個燈泡咁樣嘅藝術裝置《Bright Idea》，日日夜夜照亮條梳士巴利道。
Michael擅長將一樣嘢由立體變平面，以簡單線條設計凸顯日常事物嘅嶄新觀賞角度。今次佢就用黃色塗料包住鋼材，繞成燈泡外形，中間鏤空，正面睇牛龜咁大，但側面睇得一吋厚，視覺上十足一條直線，大玩2D同3D嘅轉變。入黑之後仲會有射燈由下而上打落去，就好似憑空出現一個用螢光筆畫嘅燈膽。
呢件大師作品由即日起至5月31日喺半島酒店前庭展噴水池展出，酒店1樓同時會展出一系列Michael嘅新畫作。