政圈近期有位搶手貨，屢傳下屆特首會向佢招手。佢咪係民主思路黃梓謙（Gary）囉，點解咁吃香？莫非因為去年單睇相已講得出中共政治局七常委嘅名一鳴驚人？「其實我當時覺得係好低能嘅問題嚟㗎，我連25個政治局委員都講得出名，哈哈」，英國牛津外交碩士畢業，難怪Gary不以為意。
半工讀攞法學學位
1982年聖誕節出世嘅Gary係首批屯門友愛邨居民，爸爸係公務員，做過懲教後嚟轉警察，媽媽係家庭主婦。升中時貪近兼覺中文易讀，揀咗區內以母語教學嘅順德聯誼總會譚伯羽中學，中一首次考試，全級240人考第166，「俾屋企人鬧死」，佢話當時打籃球多過讀書，打到球場11點熄燈先肯走人；曾經入選過Nike籃球聯賽，那些年志願都係想做運動員，呢點亦令佢喺30歲成立凝動香港體育基金，資助基層小朋友受教於港隊教練。
掛住打波都入到著名學府，生命點樣逆轉？佢話中七時發憤9個月，將打籃球嘅精力同專注放晒喺溫書，「可能有啲小聰明，日日背書，原來都唔係太難」，最終入咗港大文學院讀繙譯，畢業後喺一間國際管理公司嘅印度分公司做嘢，其後加入葉氏化工，增加對內地的認識，之後半工讀下攞到法學士學位，2011年考到獎學金去牛津修讀外交學碩士，佢話2003年嘅社會環境令佢思考管治問題，「唔係因為傘運先關心香港政治」。