翠華（1314）舊年爆發一場股東內訌，相信大家仲記憶猶新，但華華斷估唔到公司仲好有勇氣，喺官方facebook轉載咗佢「全力贊助」，專講爭家產、明爭暗鬥嘅大台劇《溏心風暴3》預告片。
大台劇最興用植入式廣告，翠華贊助拍劇，大家即刻估計到時會見到好多奶油豬同奶茶之類，預告片暫時見到沖奶茶畫面，仲喺翠華分店拍，好難唔hard sell。
而主角之一嘅夏雨，扮演角色係「草根階層、由一間小店到大開分店、全靠一雙手打拼」嘅茶餐廳老闆，同翠華主席李遠康出身有99.99%相似，真係只能講句如有雷同，實屬……
點解咁講，相信大家都仲記得年初翠華聲稱為挽回香港人嘅心，要做多啲嘢，但一個轉身就加價，兼疑似以貴價向股東收購物業，搞到被基金股東反對，至今仲未出到通函。家陣公司「全力贊助」專講爭產嘅大台電視劇，真係唔知佢嘅公關策略想點。