原籍英國的練馬師高伯新（外號喼神）持續打反擊，今次（19日）打吡大日子佢再用事實證明自己既係有料之人，亦係一個不是隨便認輸之人。
跑到第五場四班1600米，高伯新旗下質新馬「大籐王」在愛爾蘭籍騎師郭能胯下後上一攻而破，呢匹三歲馬成功開齋，今季跑至第55次賽事，馬房終於敲響今季沙田勝鼓（之前只贏谷草），單Win及組合獨贏A1分別派59.5及25.5元。
來自新西蘭的「大籐王」對上兩場均跑第二，騎師都是史卓豐，呢次史卓豐正值停賽，高伯新搵郭能幫手。結果人馬首度合作即擦出火花，「大籐王」沿途留住守在中後位置，末段從中叠以勁勢拋離所有對手，以1.75馬位之先率先衝線，贏馬姿態十分輕鬆，好明顯係一匹超班馬。
兵源早前持續減少的高伯新，少有地連勝兩次賽事，繼上周三晚以「傑飛」爆冷贏谷草尾場後，今午憑熱門「大籐王」再下一城，馬房季內增至六Win。
高伯新說：「郭能今場跑得很好，跑來很冷靜，值得一讚。此馬上場沙田1400米嫌短，今場增程跑1600米更合，希望牠不斷進步，再爭取頭馬。」
高伯新雖與續牌指標仍差十場頭馬，但卻超越少其一Win的大告脫離練馬師榜包尾，進佔尾二位置，馬房上下終於可以唞番啖氣。
第五場二至四名順序為「奪冠」、「王者再現」及「常拼常勝」，乃係全日首次全熱門天下，四重彩僅派5,181元。