【一周必看】殺女友分屍餵狗 巴乙球隊簽變態門將捱轟

【一周必看】
殺女友分屍餵狗 巴乙球隊簽變態門將捱轟

喺巴西矗立嘅基督像下,寬恕難道可以來得更徹底?巴西乙組聯賽球隊Boa Esporte日前宣佈,以自由身簽下32歲門將般奴費南迪斯(Bruno Fernandes),點知惹嚟軒然大波,除咗多個贊助商齊齊宣佈cut水喉,唔少女權組織同網民都疾呼不公!點解嘅?

原來呢位踢過法林明高同明尼路、曾被譽為國家隊希望嘅門將,2010年俾育有一子嘅前女友入稟索取瞻養費,後來被控聯同朋友殺害前女友,並將屍體餵狗,2013年被判入獄22年,但最近因為法院被指延誤其上訴申請而獲批人身保護令(Habeas Corpus),暫告獲釋。

不過,般奴亦獲得唔少球圈中人同球迷力撐,佢上周二喺記招拒絕回答有關案件嘅提問,只係表示希望重獲新生:「人們只係因為過往發生嘅事而唾棄我,當上帝打開門戶,冇人應該將佢關上。呢啲機會亦係留畀有準備嘅人。」