家陣返咗家鄉效力荷甲飛燕諾嘅36歲荷蘭前鋒古積特，佢個仔原來一樣厲害，仲喺一場比賽射入金球。古積特呢個五歲大嘅囝囝艾登，𠵱家踢緊老竇細個時踢過嘅業餘球隊奇克男生，日前艾登幫球隊踢一場比賽，展示超凡球技，先喺後場一招「告魯夫轉身」，之後引球推進仲連扭幾個，最後窄角度射入近柱。古積特將佢囝囝入波嘅片段上載去twitter，仲話囝囝同自己一樣咁熱愛足球。艾登得五歲就咁好波，真係前途無限，唔知古積特踢過嘅利物浦睇到呢條片後，會唔會快快手聯絡古積特呢？
囝囝入金球，但老竇古積特就喺周日場荷甲食白果。飛燕諾作客海倫芬靠前鋒尼高拉佐真遜同中場贊達迪維希拿各入一球，最後反勝2:1；古積特雖則冇波入，不過佢隊波可以全取三分，相信佢亦好滿意。