特首選舉期倒數，結果係咪一面倒？相信毋須八方講明，選委心中有數。之但係呢，確實不時有出人意表結局喎，所以據聞處於上風嘅林鄭陣營都不敢怠慢，做足拉票工作（當然係指有票嘅選委，冇票嘅團體就……）。據知林鄭陣營依然深信會獲民主派選委支持，有人仲同大家玩fact check，話林鄭嘅住屋政綱中吸納咗民主黨主席胡志偉建議，但白鴿黨今次all in薯片叔，林鄭呢勻嘥心機食白果咯。
倡與社企合作放租居屋
到底林鄭向胡志偉送咗乜大禮？大家睇一睇，原來房屋政綱中，林鄭提出目前未補地價嘅居屋單位達25萬個，建議容許未補地價嘅居屋業主，通過同社企合作，讓單位喺市場放租，增加居屋租盤供應，而呢個建議並非林鄭始創，胡志偉有份率先提出。
翻查資料又真係見到，胡志偉2015年初已經提出，居屋可以免補地價出租單位，一般人可能會諗，居屋已經係福利，如果比居屋業主用嚟出租賺錢，豈非雙重福利？胡志偉當時認為，出租居屋嘅業主係要同政府按業權，攤分租金收入，唔係業主一個袋晒落袋，咁做就可以短時間增加租盤供應。
本來有特首候選人接納建議，係應該「成功爭取」，不過當呢位候選人係中央「代言人」，就真係「死亡之吻」。而除咗住屋建議獲林鄭採納，查實胡志偉喺2010年政改方案期間提出超級區議會方案，最終都過到中央嗰關，令大家一人兩票。估唔到胡志偉平時唔聲唔聲，建議會嚇人一驚，唔想買大開細，大家都要留意吓佢嘅建議喇。
李八方