剛周五晚（17日）沙田馬場香港國際馬匹拍賣會，可以話高潮迭起，16號馬以破歷屆最高成交價的1,050萬，由日本城老闆劉栢輝投得。隔咗冇耐26號馬更神奇，長腿女馬主葉思貝一舉手20萬即中，完全無人舉手與她競爭。
26號三歲澳洲馬絕非血統庸劣，牠和2015年香港打吡大賽冠軍「戰利品」同父，本屆香港盃亞軍「天才」亦出自這個父系Choisir，所以葉思貝冇辦法唔開心。
當然，無論1,050萬嘅16號馬，抑或僅20萬之26號馬，都有可能全無表現，20萬成本亦唔一定賺得番。但貴馬畢竟風險較高。
翻查紀錄，對上10年香港國際馬匹拍賣會，每屆最貴成交價馬，介乎550萬至900萬不等，這10匹最貴成交價馬，竟然暫時冇一匹能回本。10駒中以「絕塵」贏得最多場數有5Win，但累積588萬獎金，相對750萬身價，也未能回本。但最慘還是570萬成交之「首飾騰寶」及價值900萬的「北京金寶」，未跑已退役。
至於仍服役中的前年最貴拍賣馬750萬之「塑料喜」，目前只獲47萬獎金，馬兒一度跌到五班，馬主鄭建生想翻本，真係要等奇蹟出現。