禮拜六英超，阿仙奴作客西布朗輸1:3，除咗賽果外，今場嘅焦點喺天空度，竟然有兩架飛機喺上空經過，一架拉住反雲橫額，而另一架就係撐雲，真係精采！賽後球迷都好好奇，究竟去到今時今日，仲有咩人會出錢租飛機嚟撐雲格！聰明嘅網民就諗到兩個答案──A：雲格同埋B：其餘19隊球迷。你覺得邊個合理？
喺facebook專頁阿仙奴入面，球迷Andy Lam就話係雲格自己拎錢出嚟幫自己迷雲，都有人贊同佢呢番見解，而另一位球迷Ziv Cheong亦話：「算吧啦！今時今日仲迷雲到底咩玩法！」至於內地網民就喺微博提供另一個猜測，網民ghost-stories話：「可能是其他19隊球迷集資幹的。」都有唔少人讚好呢句，亦有人覺得係熱刺球迷搞出嚟。除咗研究咩人租飛機撐雲格，唔少網民都話喺英國搞租借飛機呢門生意搞得過，之前已經有曼聯同利物浦球迷租過，家陣就輪到阿仙奴球迷。