多得特首候選人林鄭月娥帶挈，家陣好多人都知道薯片叔身邊有位得力助手叫羅永聰。阿聰幾年前離開傳媒加入政府做薯片叔嘅政治助理，仲同薯片叔一齊辭職兼陪住入閘。
如果薯片叔成功當選，阿聰理所當然成為新一屆曾班子成員，但若然薯片叔落選嘅話……啋啋啋，都係唔好講掃興嘢，八方只知無論薯片叔當選與否，阿聰都會去中大，但唔係轉型做學者，而係去新聞與傳播學院講talk。
原來阿聰應邀4月1日出席中大新傳校友會嘅講座，分享特首選舉嘅公關戰。係人都知薯片叔呢場選戰，阿聰係幕後重臣，唔少政界中人仲笑指論賣力度，唔知呢次係薯片叔定阿聰去選？咁薯片叔話咗同阿聰拍住上嘛，點會分你我呢？可惜呢場講座只限新傳學院嘅校友同學生參加，街客同傳媒免問。