今年香港打吡賽馬日（19日）有唔少嘢好似天注定咁，首先當然係「佳龍駒」時來運到，榮膺本港首匹四歲馬三冠王，鞍上人莫雷拉亦告首勝香港打吡。
至於來自意大利的騎師李寶利同日時勢造英雄，原本今日約滿離任馬會騎師（俗稱公司騎師）嘅佢，日前獲馬會續牌到煞科，並於這天第九場三班田草1200米，爆冷勝出蔡約翰馬房「開心遊戲」，贏得個人季內在港首場頭馬，總算吐氣揚眉。
李寶利為老牌法國名將巫斯義的準女婿，其未婚妻即貌似藝人廖碧兒的巫斯義女兒Kimberley，已證實懷有前者骨肉，並知道係囝囝，預產期為今年8月。而現年28歲的李寶利季初於谷草夜賽墮馬受重傷做手術，延至今年1月下旬至再度策騎出賽，其間一直冇馬贏最叻跑第二。
卒之苦戰至今午打吡大日子，李寶利於第九場發威，夥拍「開心遊戲」受惠於場地濕滑，貼住內欄一放到底，人馬首度合作即贏，單Win及組合獨贏A3分別派240及36.5元，而「開心遊戲」近三戰內第二次取勝，亦令蔡約翰連續第九次贏馬未斷纜。
李寶利今季來港策騎4個半月，食足4個半月白果，壓力之大可想而知，如今成功破悶局，賽後最激動的不是李寶利，反而是Kimberley，佢見男友贏馬後扮BB食奶嘴影相，一時感動，亦為未婚夫的努力不懈終獲回報而激動到喊。
第九場二至四名順序為「恆駿寶駒」、「中華之光」及「香江新星」，四重彩全冷馬天下，每注派26萬幾創全日新高。