中環在線:海航搵張智霖宣示啟德主權 - 李華華

中環在線:
海航搵張智霖宣示啟德主權 - 李華華

呢期地產界最紅肯定係海航集團喇,4個月內斥資272億元鯨吞4幅啟德地皮,唔少本港地產商輪住祝佢好運㖭呀。
既然買地買得咁高興,當然唔好畀佢停,海航4月8號會喺啟德跑道公園舉行慈善跑,搵埋「Cool魔」張智霖做嘉賓(不過唔跑),實行要宣示主場地位喇。
海航公關解釋話,香港地可以跑步嘅地方來來去去都得幾個,唔係專登揀啟德開跑喎。呢排人人都想搵海航高層講幾句,唔知董事長陳峰到時會唔會來港主持大局呢?公關就話未定實。
講開又講,今次所有參加者嘅報名費同籌得善款都會不扣任何成本全數捐畀奧比斯,無論個人名義或4至6人團體名義,人均最低籌款額都係300大元。
籌款最高嘅會獲機票同康泰旅行社禮券,但提提大家,獎品唔係由海航系嘅香港航空送出,而係由海航持股嘅廉航香港快運送出。公關話,咁嘅安排證明香港快運都好支持今次活動。