最近爆出政務官匿名爆林鄭開會鬧人鬧到喊，又指佢扣起土地開發名單，林鄭陣營漏夜發稿否認，認為係揑造。我好奇之下致電AO舊同學收風，佢話林鄭鬧爆人就成個高層政務官都知，根本唔係新聞，AO其實唔介意互片，開會時各持己見，拗執行細節，拗JR風險，對事不對人。英式文官體系重視執行力，官員咀嚼細節為了令政策出台更周詳，拗還拗，大家唔會動氣，但林鄭式鬧爆就不屬於AO文化。何解？
英國文官體制的政務官係靠一套制度，唔係靠人治，唔關邊個勤力邊個懶事。例如財務科官員，邊個坐落去都係一樣，揸數揸得好緊，如果政策局建議多漏洞，或者唔跟規矩開先例，一同庫務局官員開會，就肯定俾人鋤散，無論建議來自政策局長，定係特首，政務官均一視同仁。麥理浩年代出身的政務官，官威大就首推楊啟彥，為人火爆，曾經是首任華人庫務司，最有機會做首位華人布政司，可惜不獲英人信任，最後畀陳太攝咗個位。同楊共事的政務官不少畀佢鬧過，但冇人會反感，因為楊啟彥係教AO師弟師妹做嘢。官威是要其他人心悅誠服，咁先至叫做威！將下屬變奴才，又何來威望呢？
林鄭式鬧爆最大問題係出發點並非為了指導下屬做好工作，而係自己表演，輕蔑嘴臉言詞形於色。薯片叔上次公開論壇寸佢喜歡「閉門做……嘢」，這是AO界人所共知，她自視極高，自己已有定案仍吩咐下屬畀意見，但又唔講自己想點，到下屬提出建議後就鬧爆，批評無新意、守舊，然後施施然拿出自己早訂下的方案，叫大家跟住做，如果下屬唔識做仲駁嘴，就繼續鬧爆。如此上司試問如何可以建立領導威望呢？劉兆佳指林鄭有威望，是違心之言，因為根據官場消息，林鄭在上屆政府有三大討厭：劉兆佳領導的中央政策組、譚志源及梁卓偉領導的特首辦、唐英年的政務司司長辦公室。當然還有一眾被她視為廢柴的同僚：張建宗、林瑞麟、曾俊華……
新政府降格為執行機構
梁文道在〈十年不變〉一文中引述2010年社會福利署前署長余志穩退休後的專訪，複述林鄭任民政事務局常秘時，一意孤行搞柴灣青年廣場一事：「我們知道好難自負盈虧，決定投標出去，民政局包底。她從財經事務局出來，不同意：『有乜理由咁做？』死都要出面的人做，我告訴她，青年中心蝕梗，無人肯包底，她不聽：『你哋做乜咁樣決定？』……林鄭來了數月，我便走了，她寫過我一次report，比起以前娟姐（按：即李麗娟）、何志平，當然寫得無咁好，可能她寫所有人都係咁差！」柴灣那幢勞斯萊斯青年廣場至今不知所謂，而始作俑者就是閉門做嘢的林鄭！
林鄭式鬧爆背後，反映她只需要一班執行的奴才，不需要有獨立思考的政務官，這從近兩個月其老土競選工程可見，物以類聚，曾俊華重用的年輕人，有來自湯家驊民主思路後生仔、有老餅舊政務官同僚、有自己政助，當老細會用你的idea，尤其是年輕人，自然會死砌難砌做到加零一，並非金錢買得到，而是來自別人的尊重，這才是做領導的基本品格。
可以預見林鄭組織的新政府，是奴才型政府，或者，這就是共產黨選拔她的原因，整個特區政府將downgrade為執行機構，政治領導者另有其人。而薯片叔死因，也不是有甚麼勾結外國勢力、顏色革命黑材料，只不過他欠缺做奴才的質地！
添馬男