【財經專題】
香港戲院生意難做，過去20年執完一間又一間。但有營運商坦言形勢已變，超級英雄等大片成功「call返」觀眾入場，深信只要有好戲，大家「一齊笑、一齊喊」的共鳴仍無法取代，加上地區戲院需求熱切，故決定加快擴張，攻入偏遠地區開戲院。
記者：方楚茵 卓茗
在1993年全盛時期，香港共有119間戲院，堪稱每區「都有幾間喺左近」，但過去廿年行業萎縮，如今僅縮剩49間，座位數目亦由高峯時12萬個，大減七成至3.7萬個。不過，如睇票房收入，近年卻有回升之勢，2011年香港總票房約13.92億元，至2015年累升近四成至19.54億元。近日政府亦計劃在沙田及啟德兩幅商業地地契中，加入須建戲院的條款。
觀眾不願跨區睇戲
洲立影藝（MCL）總經理黃寶珠坦言，不是期望行業要回復至93年時高峯，但深信只要有好戲上、電影業肯向前行，市場就有需求，因大家「一齊笑、一齊感動，明明我唔識你，我暗地裏攞廁紙，點知隔籬位又攞」，這份隨劇情同笑同哭的共鳴感動，是睇碟、BT或別的娛樂無法取代。
黃寶珠近期少入戲院，惟並非「冇戲想睇」，而是與許多香港人一樣，生活太忙碌，居住地區又無戲院，要「山長水遠」跨區睇戲，才令她卻步。就算錯過好戲上畫、之後再買碟，「但我睇到瞓咗，唔關套戲事，係個（屋企）環境令我無興趣再睇。」這令黃寶珠更深信「區區有戲院」有得搞：「唔使再怕狀態不佳，輕鬆換件衫即落樓睇戲，相信會令觀眾入場的意欲大增。」
嘉禾力拓周邊商品
MCL最近攻入粉嶺，吸引不少北區家庭客、學生哥光顧。黃寶珠稱，若空間無法滿足，細院亦是可行的發展方向，由於技術突破，去年引入「無機房」設計，慳了半層放投映設備的空間，改在半空建迷你機房，令戲院對樓底要求由以往8至10米，降至現時5、6米，選址上有更多選擇。
同樣進攻北區的橙天嘉禾（1132）副首席營運官鄧小慧亦相信，只要有好戲就有觀眾入場，尤其近年超級英雄系列大熱，每年均吸引大批觀眾：「好似今年有《蜘蛛俠：歸來》、《神奇女俠》、《變形金剛》……」而超級英雄及迪士尼熱潮，更為戲院打開新財路：賣周邊商品。「好似限量兩、三千套，印了電影主題的爆谷桶，轉播Live Concert同時賣埋紀念品，有人通宵排隊買，周邊商品收入可佔整體票房12至15%。」
鄧小慧指，六、七年前電影轉數碼化後，更出現「細片潮」，原本無力負擔昂貴電影底片費、宣傳費等的小本製作，現在不用再「出一套蝕一套」，網上宣傳豐儉由人，助電影業百花齊放。
【北區居民意見】
居於上水的劉太：「粉嶺有戲院，勝過往日要出旺角、九龍塘睇戲，位置方便，加上票價較抵。只要有好戲上，都會密啲入場睇戲。」
居於上水的余太：「未試過在北區戲院睇，但因為近都會試下，會睇密啲。喺屋企睇係唔同嘅，喺戲院氣氛會好啲，又可以順便行街。」
