係人都知基斯坦奴朗拿度（C朗）係球霸，前晚喺皇家馬德里作客贏畢爾包2:1場西甲佢又嚟料，因為佢唔滿意喺完場前10分鐘左右被教練施丹換走，之後憤而爆粗！施丹就冇正面回應，淨係話佢想換邊個就邊個，擺明要話畀C朗知，佢先係皇馬最大嗰個。
施丹神回：想換咪換
皇馬上周六喺西甲作客畢爾包，憑C朗助攻賓施馬同埋卡斯米路入波，結果贏2:1，家陣以27戰得65分繼續排榜首。呢場波C朗雖然冇入波，但就成為咗焦點，皆因佢喺79分鐘俾施丹換出嗰陣口噏噏，忍唔住爆咗句：「X，點解換我？」
西班牙《阿斯報》話，C朗唔係對住施丹爆粗，佢返番入後備席亦有同該法國名宿握手，但喺被換出時講粗口，擺明係挑戰教練嘅權威。但都有人幫C朗講好說話，話佢爆粗只係因為入唔到波而發自己脾氣，同施丹冇關；亦有指只係西班牙傳媒炒作，C朗根本冇講粗口。其實C朗之前都試過係咁。季初佢喺作客打和拉斯彭馬斯2:2場西甲，踢到72分鐘被換出時，都被指向施丹爆粗。
施丹賽後就神回C朗，話換邊個由佢話晒事，球員冇權出聲。呢位法國球王話：「比賽尾段我哋想平衡啲，於是改踢4-4-2陣式。至於點解換C朗？有需要時佢就要離場，由其他球員入替，就係咁簡單，佢應該滿意自己嘅演出。」C朗雖然係好波，但畢竟都32歲，唔可以好似之前咁場場打足90分鐘，所以施丹間唔中換佢出嚟都合情合理。
巴利擬植髮救「光明頂」
至於C朗隊友加里夫巴利一樣被傳媒狙擊，但就唔係因為爆粗，而係因為佢要植髮。Man Bun頭已經係呢位威爾斯國腳嘅標記，但係人都知佢用呢個髮型嚟遮住佢個地中海。英國傳媒話，巴利認為咁樣唔係辦法，仲考慮去植髮。水晶宮中場列特利之前花咗一萬鎊去植髮，效果都唔錯，佢本身同巴利好老友，所以消息指巴利喺植髮之前，會先問問列特利嘅意見，然後再諗點搞。