近日總係天陰陰濕漉漉，濕度日日幾乎爆標，洗咗啲衫晾極都唔乾，而且有陣霉味，搞到費清覺得連個人都霉埋。望天打卦（天文台話呢幾日仲會落雨），不如搵人幫手；德國家電Bosch產品部Orange橙哥話，新一代洗衣機玩高科技，近日有款ActiveOxygen洗衣機，將工業用活氧消毒殺菌技術，引進家用電器。
橙哥話，活氧即係大家熟悉嘅臭氧（Ozone），係強力氧化劑，可以消毒殺菌、辟除異味，根據德國WFK研究所測試，可以殺絕衣物99.99%細菌，「一般洗衣機係用高溫水或消毒液殺菌，但熱水會令衣物縮水，消毒劑會令皮膚感敏；採用活氧就可以低溫洗衫，解決咗一般洗衣機嘅問題。」
活氧除菌呢個技術亦可以做另類「乾洗」，橙哥話回南天晾衫，衣服怕會有陣霉味，或者衣櫃受潮，只要將呢啲衫放入洗衣機，輸出活氧「乾洗」15分鐘，就可以殺菌除味，「就算係打完邊爐啲衫都除到味，有小朋友嘅家庭，可以用嚟乾洗毛公仔，除細菌、塵蟎。當然，乾洗啲衫唔可以除污。」
費清即場放個毛公仔入洗衣機，㩒個掣，就見啲活氧噴出嚟；Orange話，機頂安裝咗活氧製造機，吸咗氧氣製造成活氧，經管道噴出滾筒殺菌後，活氧回到活性碳盒變回氧氣，成個過程唔會外洩活氧。部機賣$10,800，貴一般洗衣機一截。
另一家電牌子西門子就用咗另一種方法擊退回南天，就係洗衣、乾衣同除菌三合一洗衣乾衣機。西門子產品部阿Miu話，因應香港「劏房」單位面積細嘅環境，洗衣乾衣合一功能更適合，「呢部機㩒一個掣，洗衫、乾衣同除菌一條龍完成。」新機用熱風技術除菌，成個程序先利用70℃熱風除走衣服上細菌達98.29%，再低溫洗衫，唔使用熱水令衣物縮水、甩色，最後乾衣，「洗衣量8公斤，成張冷氣被都乾到，唔使再驚回南天。」新機又有特強烘乾、輕柔烘乾兩種模式選擇，「如果揀咗輕柔模式，將啲衫烘到差唔多乾晒，再拎去自然晾乾。」
佢又話有一個小貼士，部機有裇衫模式，洗衫乾衣後，啲衫裇乾濕程度，剛剛可以再用熨斗熨到畢直着返工，呢部三合一機賣$6,690。
消委會就教路，洗衣機唔好擺在浴室潮濕地方，否則啲水濺入部機好易壞；洗衣機用電量大，其供電插座唔好駁其他電器，而想慳水慳電，要將物料種類或骯髒程度分類，再根據生產商提供嘅方法選擇合適洗衣程序；仲要定期清理棉絨隔濾器入邊積聚嘅衣物纖維，以免阻礙排水。
費清＃要生計，也要生活＃毋忘初衷