每年一度之耶魯新亞（簡稱YUNA）學生交流計劃，在三月份輪到耶魯學生來港。三月中旬係美國大學春假（Spring Break），大量學生從美國東北西北寒冷地區走去墨西哥或佛羅里達州玩樂，以往曾有不少荷李活青春電影以此為主題，內容離不開大學生狂歡、大麻、飲酒、性開放等等，有一年一位朋友兒子去佛羅里達參加「春假」，大把男女同學同行，左丁山儍儍地問朋友Y：「你驚唔驚個仔玩出禍，啲美國學生聽講玩得好癲嘅喎？」朋友Y答得妙：「男仔咪去玩到夠囉，冇蝕底，如果佢係女，我就唔准佢去，叫佢放假返香港！」
呢批耶魯學生共8人，有耶魯教授及雅禮協會職員陪同來港，係有得玩，但遊學主題就幾嚴肅，叫做Authenticity and Modernization，留港13日，再加三日去上海（新亞校董黃經國博士贊助），每日要參加論壇，聽講座，見立法會議員（新亞校友何啟明）及曾鈺成，認識中醫中藥（梁秉中教授主講），到長洲、深水埗、深灣、蘭桂坊（見盛智文）、重慶大廈等等。左丁山負責一個環節，就係請佢地吃一餐authentic Cantonese cuisine，哦，容易啦，就請佢地去陸羽吃大包、叉燒包、雲腿白鴿甫、揚州炒飯、糯米糍等等地道老式廣東菜，果然個個食到搖頭擺腦。
唔係淨係食咁簡單噃，左丁山還請來資深政治編輯楊健興（Chris Yeung）在樹仁大學講課後，趕來陸羽，向呢班耶魯新亞學生講述特首選舉形勢及附帶之本港政治問題，點知8位耶魯生之中，有三位讀政治學，一位讀歷史，佢地對香港政治好有興趣，討論到幾乎過晒鐘先至匆匆拍一張大合照，然後趕去立法會，唔知有冇時間在陸羽對面影一張相呢？嗰度有一塊紀念牌嵌在牆上，上有說明指出史丹利街24號（陸羽現址）在1900年係中國日報原址，中國日報當年用現在政治術語講，係反華亂黨基地，策劃反清大本營，報館三樓係1900年惠州起義嘅指揮中心。來陸羽飲茶兼影埋呢張紀念牌照片，夠晒authentic喇啩。
新亞學生每年在農曆年去耶魯校園，耶魯所在地New Haven，係一個沉悶小城，無甚足觀，唯一好處就係學生不會因城市姿采生活而分心，可專心讀書。香港係好好玩，外國學生來此，人人讚好，弱點呢？咪係太多好嘢，有時發覺讀書難以專心囉。