【本報訊】乳癌，是香港女性最常見的癌症，每年平均有2,300多宗新症，近年發病率不斷上升，也有年輕化的趨勢。割除右邊乳房再做重建，王惠芬做化療前，先與丈夫到髮型屋剃頭。「我習慣每日洗頭，入院前索性剃光頭，我老公話陪我一齊剃，我話唔好咁肉麻當有趣，佢知我連情侶裝都頂唔順，話只係想同我共行」。結果，兩個光頭的合照，笑容一狂放一含蓄，無限量的支持，盡在不言中。
半生瀟灑今為親人自愛
丈夫Michael也是社工出身，現於明愛專上學院教書，記者笑王惠芬平日在家一定「有佢講冇老公講」，口若懸河的她搶白：「佢教書，平時做嘢講好多，咁喺屋企就梗係我講晒」、「佢好了解我，佢知道我要做嘢先至有生命力，但咁樣又會拖垮我，衝完一輪，返到嚟好攰又面青，佢就會唔開心」。學習平和慢活，對於生性急躁的她，確難若登天。「有段時間，唔知要將自己放喺咩位置」。
家庭主婦？「我唔鍾意煮飯」。學生？「個碩士（課程）讀到一半因為病停咗」。工作？「我辭咗職嘞喎」。安心做病人？「我真係唔想做」。停下來面對自己，原來好難。「可能去學手語，倡議手語都好」。仍舊諗頭多多，對生死，她自言「去番上帝嗰度冇咩唔好」。但回心一想，自小與她相依為命的姐姐，定會傷心欲絕；對她無限包容的丈夫，今後將如何是好？
人到中年，她發現自己的瀟灑，原來有點自私。「有次喺醫院，突然喺度喊，我同家姐講，我係病但至少有你有老公，有啲人病咗冇人陪，真係好慘」。家姐沒好氣，繼續張羅為她抹面倒湯。「有醫生話我𠵱家嘅狀態，就好似一粒雜嘜嘅舊電池，叉極都叉唔起」。要運動，才可重新建立免疫力，為身邊緊張她的家人，王說已下定決心，好好愛惜自己。上月社工日，她參加人生第一次跑步比賽，4K跑了45分鐘！「跑最尾，原來都有獎牌！」世界原來就很美好，她大笑。
■記者呂麗嬋