歷史學大教授L個孫在九龍塘樂基幼稚園讀書，間幼稚園有啲名聲，入學並不容易，教授L兒子係大機構嘅公關部要員，與左丁山認識多年。哎吔，估唔到，九龍塘樂基幼稚園嘅校舍竟然唔續約，業主話要收回，七月後就停課，左丁山聞訊，都戥教授L與小L煩惱，前幾日（星期二）本欄先至講過幼稚園、小學撲學位甚難，有時要動用阿爺阿公嘅面子，估唔到同時間就知道小L要去撲學位。
現在知道啦，在香港為幼兒搵幼稚園，除咗校譽之外，仲要查埋間幼稚園是否有長期租約或自置物業，租約起碼三至四年（兩歲讀到六歲）先至夠穩陣，唔會出現讀讀吓斷約關門大吉嘅情況。
但呢樣係理想主義啫，香港樓價貴，辦學機構未必買得起校址，屋租約更是業主市場，業主大晒，租期有短冇長，想落家長好難避得過呢項幼稚園租約滿/停辦嘅風險，只可望天打卦，對家長及小朋友好唔公道。
樂基幼稚園據講有三間，沙田駿景園樂基，與碧濤花園樂基係同一教育集團經營，九龍塘樂基係另一集團，發生事故後，學生點辦？人情上應該係沙田兩間樂基接收嘅，但技術上好有困難，一來地方有限，幾難一時之間接收晒所有學生，二來每年申請入駿景園樂基嘅已有一千名幼童之多，學位根本供不應求，三來九龍塘的學生可能住在九龍塘/九龍城一帶，點想孩子跑到去沙田駿景，碧濤返學呀。教授L與小L同住在沙田，或者係幾希望小小L進入駿景樂基嘅，其他家長未必係咁諗。
成日話香港讀書難，九龍塘樂基幼稚園提供咗證明，下任特首會唔會肯花時間研究吓呢個問題？特首新上場未必有時間去認真諗，但下一任教育局局長一定責無旁貸，要解決呢項問題，為人（新特首）為己爭取民望，爭取政績。之不過，邊一位肯做新教育局局長呢？中貿林有孫女將近歲半，已開始為幼稚園爭位擔心，呢日泰國A回港，與中貿林嘆茶，叫左丁山午飯後過去坐坐，估唔到一坐低中貿林就問邊一位會係理想教育局長人選，佢似係林鄭派，唔通正在搜集意見？左丁山隨口噏話張炳良。中貿林話：「佢算係好人選，不過話咗要退休咯噃。」退休？搵董先生去攬吓佢或者得呢，如若不然，搵戴希立啦，中聯辦一定高興，本來曾德成都啱，但既然曾被CY炒魷，CY 2.0未必肯搵佢。