DSE中文口試已經開考，唔少考生都喺社交媒體分享考試心得，甚至奇遇。有網民近日就喺高登、名校Secrets分享經歷，有自稱係應屆考生嘅網民留言聲稱，話因為自己最近已獲台灣嘅大學取錄，所以一心玩嘢，喺應考中文科口試嘅時候講英文：「So, today we are gonna to discuss about...... 」，佢話一講完，即刻俾考官打斷，提醒佢係考緊中文科會話，但佢就一於少理，仲話答考官：「中文說話唔講得英文？你咪扣我分囉」，結果再被考官警告如果再係咁，會被要求離場。
該網民話之後佢多次打斷其他組員嘅發言，到考完之後，幾位同組應考嘅組員，都走去考官面前要求重考，其中一位仲忍唔住喊咗。
有網民話同組嘅其他考生，真係多得樓主唔少，亦有唔少網民覺得樓主只係寫潮文，並非真有其事。
考評局發言人表示，就口試中考生秩序，局方有既定程序處理。主考員在主持考試時，會確保考試按既定程序進行，若發現有任何考生壟斷發言或違規情況，主考員會作出適當跟進，並於試後填寫報告。
口試過程會被錄影，考評局就主考員的報告翻查有關錄像，如確定有考生違反考試規則，個案將交由「常設委員會」按公開考試委員會的指引作出適當懲處。根據《考生手冊》，考生如行為不檢，或肆意擾亂考試秩序，可能會被取消科目成績。考生如作出其他不檢點的行為，有關科目成績可能會被降級。發言人又稱，局方會按既定程序跟進受影響的其他考生。