早前「王子」費蘭度托利斯喺馬德里體育會鬥拉科魯尼亞場西甲撞親後尾枕，一度冇知覺，好彩吉人天相，瞓咗一晚醫院就冇事。不過，英冠哈特斯菲爾德嘅中場莊拿芬賀治，就可能冇費托咁好彩。
賀治喺上周五哈軍作客布里斯托城場聯賽嘅上半場，同自己隊長赫德臣意外相撞，頸部重創，要喺球場治理咗14分鐘先送院，之後仲接受咗兩次掃瞄；連哈軍領隊華拿都話，賀治應該有排唞。
可能受到隊友重創困擾，喺比賽重開之後，賽前被睇高一線嘅哈特斯菲爾德就散晒，上半場連失兩球，下半場再失多兩球，最終爆冷輸0:4；雖然輸波後仲係排第三，但要爭前兩位直接升班，機會就細咗喇。至於要護級嘅布城雖然全取三分，但仲係喺榜下游徘徊。