杜汶澤日前請來何韻詩擔任嘉賓，在灣仔拍攝奇妙電視飲食節目《杜汶澤食住上》，阿澤整了蘿蔔糕，阿詩則整果撻和玉子燒。有人擔心奇妙電視開台或會有變數，但阿澤一於少理：「我唔理咁多，我對收番啲錢好有信心，呢啲自不然會知，唔使競猜。」
阿澤與阿詩同樣敢言，對社會、時勢都坦白表達看法，阿詩踢爆阿澤拍這個節目很難請嘉賓：「同我嘅狀況一樣，本來都唔想嚟，但見佢幫過我影相先嚟，幾驚佢累我。」阿澤即謂：「大家咁樣互相利用都唔係辦法，請嘉賓好頭痛，首先諗欠我人情、幫過佢做嘢嘅人。我主動幫薛凱琪影演唱會海報，影完我就問佢嚟唔嚟做嘉賓。」阿詩反問阿澤有否邀請汪明荃？阿澤說：「佢係無綫嘅靈魂，TVB屹立不倒都因為汪明荃，點會倒戈相向。」
唔搵老婆倒戈
阿澤指暫時仍欠三至四個嘉賓，又稱讚陳靜及江若琳夠義氣，但老婆田蕊妮因是無綫旗下而不能幫手，他笑說：「你估TVB𠵱家冇咗佢又得咩？繼汪明荃之外就到佢。我𠵱家搵嗰啲都係之前做過我老婆，佢𠵱家仲做緊我老婆，無謂咁邪啦！」談到阿田演出劇集《迷》演技大受好評，阿澤即誇耀老婆是無綫開台以來前三位好戲的女演員：「我覺得最好係藍潔瑛，跟住係鄭裕玲，跟住到田蕊妮，阿姐就超越演技，係beyond acting。」
拒講偷食助手
此外，阿詩早前被指背女友鄧九雲偷食，與女助手行為親暱，問她是否和女助手發展中？阿詩說：「嗰個報道加咗好多佢哋自己嘅角度，亦加鹽加醋，對各方面都唔公平，我冇必要因為佢哋嘅猜測而去回應，或因為大家好奇而再講落去，我有我諗法，對得住身邊所有人，對得住我自己就夠。我嘅感情從來都係大家猜測出嚟，我冇咁豐富。」鄧九雲有否過問該事？她謂：「我身邊嘅人會清楚件事，我私人生活會交代清楚，但唔想向外交代八卦新聞。」
採訪：王連連
攝影：陳慧安