賭王何鴻燊四房公子何猷君周一喺微博鬧爆香港航空，佢為咗幫朋友搵番本passport，陪朋友喺機場等咗7粒鐘，之後有職員認出佢係「何生個仔」，花十分鐘就即刻搵得番。猷君覺得香港航空勢利，對乘客並非一視同仁。
唔少網民大讚猷君好貼地，有義氣陪老友瞓機場，又唔會亂「響朵」，呢個富二代真抵讚！據悉猷君因為呢件事，微博嘅粉絲人數一下子急增咗10幾萬人，如今有48萬，直衝50萬大關，仲有網民自發開咗「何猷君MarioHo的粉絲群」、「何猷君全宇宙后援會」等，人氣勁過唔少明星藝人。不過，與出名係何家至索嘅三房千金何超蓮嘅102萬粉絲人數相比，仲有少少距離，超蓮向來好識留住粉絲，差唔多每個星期都會貼靚相派福利，間中仲會親自回覆網民，同粉絲互動一番。