【本報訊】有關六七暴動的獨立紀錄片《消失的檔案》引起熱議，融樂會創辦人王惠芬最感觸。「就好似香港嘅少數族裔，一步一腳印咁爭取返嚟嘅嘢，政府一聲唔該，話係自己做，好唔公道」。一直為少數族裔發聲的她，半年前證實患乳癌二期，現仍需接受標靶藥治療，深居簡出養病，卻不忘整理資料，出版記錄少數族裔在港奮鬥史。「唔正視歷史，點奢求政府回應佢哋嘅訴求？」
記者：呂麗嬋
相約在她位於藍田的家會面，說話連珠炮發又表情多多，除了多了一個大光頭，這個官員眼中的「麻煩友」，仍然熱血。「好多人嚟探病，都話覺得自己似病人多啲！」說時，連她自己都忍俊不禁。朋友形容她有過度活躍症，這個烈女直認不諱。「一見人就精神，好似迴光返照，返到屋企就死咗。以前日日十幾個鐘做足7日，有個對象係教育局，有無限精力去針對佢，精力發洩到，𠵱家明明好攰，卻眼光光失眠」。
像高速轉動的齒輪，停不下來，躁動到要服用抗抑鬱藥。「我唔係乖嘅病人，唔識死」。手術後緊接6針化療，以為沒事，與年輕社工組成「社福同行」拍住上，出戰選委會。「做化療，頭3針冇嘢，到第4針不停嘔，食唔落又手腫腳腫，好辛苦」。副作用一支比一支強，全面停工，自傳除外。「癌，八成幾好得番，我唔知係咪剩番嗰一成，如果死咗，記憶會隨着我走，留唔低條氣唔順。」
自言有輕微讀寫障礙，王說如非教育局隨意改寫事實，沒想過要為少數族裔立傳。「2004年，教育局受壓下改變中一同小一派位制度，係好多人花咗好多年努力爭取，但你翻查政府文件，全部變為我哋教育局好關心少數族裔……」還有早年IVE基礎文憑，引入以英文為教學語言，她說實情是嘉道理慈善基金會贊助融樂會100萬，以包班買位形式開辦課程，少數族裔需付多近一倍學費，但政府文件隻字未提，仲變成「政府關心少數族裔的需要」。
不忿教局邀功
看着事實走樣，即時眼火爆。「唔係要爭個咩嘢credit，但咁樣偷取別人嘅成果，好唔公道。」人稱「膚色的鬥士」，王惠芬是首個高調站出來為少數族裔爭取公義的社工，2001年創辦融樂會，跟政府交鋒，倡議把中文作為第二語言，平等升學。「由只有4間學校收少數族裔學生，到𠵱家佢哋可以讀副學士、IVE，甚至大學；呢啲，都係一步一腳印咁爭取返嚟嘅嘢」。
「今個月底要搞掂，希望趕及7月書展出版，現正籌款，搵繙譯出埋英文版，希望有生之年，見證到本書出世。」她說：「睇《消失的檔案》，真正百般滋味，歷史隨時會被消失被修改，確實好可怕。如果一個政府唔能夠正視歷史，你仲點奢求佢回應訴求？希望嚟緊嘅特首，盡快通過檔案法，無論正面負面，都係香港走過嘅路、係香港嘅歷史。」
就如她，一場大病，被迫小休，回顧人生歷史，但她直言，當前最需學習的，是甚麼讓齒輪慢下來？2014年6月，她辭任由她一手創立的融樂會總幹事職位。「做咗十幾年，覺得同教育局嘅對話已到盡頭，唔應該阻住地球轉。」
專心養病暫別江湖的烈女，仍然心懷一團火。「仲有8針（標靶藥），體力許可，仍希望繼續做社工。」與有需要的人同行，有意義的過好每一天，毋忘初衷，不肯輕易露出病容的她說。