今年DSE已經開考，中文科口試噚日就出現一條標點符號題目，就係「以下哪一個標點符號更能象徵香港社會？」只有感嘆號（！）、省略號（……）同問號（？）畀考生選擇。講到標點符號問題就梗係要問問，有「逗號先生」之稱嘅鄺神鄺俊宇。鄺神一嚟就笑住話「（題目）逗號呢？點解冇逗號㗎？」仲同八方講吓對3個標點符號嘅睇法。
鄺神：省略號諗起林鄭
佢話一見到感嘆號就自然諗起民建聯周浩鼎，事關講親個「鼎」字之後都會加番個「！」至於省略號就諗起奶媽林鄭月娥係政綱寫「我的願景是……讓香港更美好」被網民插爆用錯標點符號；而「？」就本身已經係一個問號咁話。咁唔知鄺神對用咩標點符號象徵香港有何高見？佢話：「逗號代表更多精采章節係之後，梗係用逗號最貼切，香港民主、政制𠵱家仲未完，所有嘢都未見到下一步點發生」。佢仲好有信心咁講，如果加埋個逗號，一定好多考生會揀㖭！